以前去鴨州除咗跟團，唯一嘅方法就係去到位於禁區內嘅沙頭角公眾碼頭坐街渡喇。但最近船公司開設咗新航線，由馬料水往返吉澳同鴨洲，方便遊客。航線逢星期六、日及公眾假期服務，來回票價$90，單程$50。而我哋上次去咗沙頭角玩，就順便去埋鴨州玩啦！

由沙頭角去鴨州，單程船飛＄20。不過，來往鴨州嘅班次唔多，記住check清楚航班時間。

離開碼頭後，沿岸嘅景色就係中方嘅沙頭角同鹽田港嘅繁華，反之，另一邊就係香港嘅離島，保留住大自然嘅景色。

而鴨洲嘅命名係因為好似一隻半浮於水面嘅鴨仔，所以航行途中，見到鴨州就記住加多7分想像，睇睇呢隻鴨仔喇。

鴨州故事館
鴨州除咗碼頭、涼亭、公廁，籃球場、村公所同村校之外，基本上都無咩設施，而鴨州當年由傳教士傳教，所以島民都係信奉真耶穌教會，係香港少數嘅離島只有教堂而無天后廟。

但鴨州最新嘅景點當然要數鴨州故事館啦！不過，只限團體提前預約或星期日及公眾假期向公眾開放。

其實鴨洲故事館係由鴨洲漁民子弟學校改建而成，內有展板、居民生活舊照、工具、仲有獨特鴨洲話同鴨洲漁歌教學等等，介紹鴨州嘅聚落同生活方式，展示蜑家嘅文化遺產。