每次搭飛機，我A姐最最最最期待一定係大隻靚仔空少……派俾我嘅飛機餐啦！實在太耐無飛過，好掛住小鮮肉飛機餐呀！今日我哋嚟到大角咀嘅The Galley by Cafe Proud Wings，餐廳以機場同機艙為主題，勁多打卡位。飛機餐除咗chicken同beef，仲有好多選擇。當然，搭飛機就梗係要飲番杯「Signature Drink」啦，Happy Hour指定時間每杯只係$12起呀！

黑松露野菌忌廉湯、法式蟹肉龍蝦湯
餐湯分別叫咗黑松露野菌忌廉湯同法式蟹肉龍蝦湯，兩款都真材實料！黑松露配野菌嘅忌廉湯真係無得輸，黑松露好香好濃，成個湯好creamy！至於法式蟹肉龍蝦湯亦加入咗好多蟹肉，飲嘅時候夠真材實料，勁有口感。

蟹肉牛油果沙律
擺盤方面，上層係蟹肉，中層係牛油果，下層係沙律菜。餐廳一啲都唔孤寒，蟹肉份量好多，所以食嘅時候好有口感，而且夠晒新鮮。

100萬度馬拉魚蛋
魚蛋由馬拉入口，所以好香魚味，而且非常彈牙！魚蛋即叫即炸，上枱夠晒熱辣辣，非常香口，而且份量好多。但點解個辣椒油咁少嘅？因為呢個辣油真係真係好辣，點少少都足以噴火。雖然好辣，但又真係好好味呀！

燒海鮮拼盤
主菜方面，呢個燒海鮮拼盤就有三文魚、帶子、魷魚同虎蝦。整體份量十足，虎蝦大大隻，肉身超彈牙，蝦頭仲有蝦膏架；魷魚同帶子帶有少少鹹香調味，夠香口入味，但建議帶子可以生番少少會更惹味；至於三文魚肥美，夠嫩滑。

招牌爆脆乳豬
講到餐廳嘅重點就梗係招牌爆脆乳豬啦！乳豬皮真係超級脆呀，雖然邪惡，但又忍唔住係咁食，好惹味！不過，我哋就略嫌肉少骨多，食嘅時候唔太方便。